NOBYEMBRE 18, 2019 – Adunay dugang 31 ka mga kanhi sakop ug ka-alyado sa New People’s Army (NPA) nga mikanaog ug mitahan sa ilang kaugalingon ngadto sa mga kasundalohan sa 88th Infantry Battalion, Maramag, Bukidnon alang sa pag-limpyo sa ilang ngalan ug mahimong malinawon ang ilang kinabuhi.

Sa lungsod sa Quezon, Bukidnon, lapas na sa 160 ka kanhi sakop o ka-alyado sa mga komunistang lumilihok ang nibalik sa sabakan sa gobyerno sukad sa pagpatuman sa Executive Order No. 70 o End Local Communist Armed Conflict (ELCAC).

Gi-representar ni Acting Municipal Social Welfare and Development Officer Ms. Wena Pagayon ug Executive Assistant Laurente Alvarez Jr. ang lokal nga panggamhanan sa Quezon, Bukidnon sa gipahigayon nga profiling sa maong mga personalidad, kung diin gikuha ang mga datos sama sa ilang pangalan, puluy-anan, ug mga panginahanglanon.

Pinaagi sa maong profiling, mahibal-an sa gobyerno sa Quezon ang pamaagi sa pag-ayuda nga sibo sa ilang pangandoy nga mabuhi nga malinawon inubanan sa ilang mga pamilya.