ENERO 8, 2020 – Gi-hangyo ni Mayor “Poling” Lorenzo ang kapitanes sa 31 ka barangay sa Quezon, Bukidnon nga sugdan na ang pagpasabot sa katawhan bahin sa road right of way (RROW) ilabi na karon nga gi-mando sa nasyonal nga gobyerno ang road clearing operations.

Atol kini sa gipahigayon nga panagtapok sa Association of Barangay Captains (ABC) karong adlawa sa ABC Hall.

Matod pa niya, higayon na kini nga hawanan ang mga dalan, haron nga masugdan na ang pagpa-ayo o rehabilitate niiini, ilabi na sa mga barangay roads.

Iya usab gipadayag ang tinguha sa administrasyon nga magtukod og internal road network nga pwede agihan sa mga bao-bao, motorela, ug uban pang public utility vehicles haron nga mahimong luwasnon ug hapsay ang biyahe.

Gi-dugang usab ni Mayor Lorenzo nga base sa pag-daghan sa mga negosyo ug uban pang umaabot nga establishments, posibleng mahimo nga sentro sa komersyo ang Poblacion, Libertad, ug Salawagan, busa kinahanglan nga adunay internal road network nga nagpalibot niini.

Gi-awhag ni Municipal Engineer Roy Niones ang mga kapitanes nga maghatag og imbentaryo sa barangay roads, haron nga masugdan na ang pagplano sa pag-rehabilitate sa mga dalan sulod sa barangay. Gi-hatagan lamang ang barangay councils taman Enero 31 haron nga matuman kini.