PEBRERO 3, 2020 – Andam na ang lokal nga gobyerno sa Quezon, Bukidnon sulod sa pagdumala ni Mayor “Poling” Lorenzo sa pag-siguro nga mapagawas na ang lapas 82 ka proyekto ug programa nga gitakda para sa tuig 2020, sama sa paghimo sa Quezon Community Hospital nga mahimutang sa karaan nga Municipal Hall.

Gipamahayag niya kini atol sa gipahigayon nga Monthly Convocation.

Sutaon sa mga doktor ang balatian sa mga pasyente sa maong Community Hospital, haron mabal-an ang sunod nga insaktong lakang sa pagpanambal. Mahimo kining barato ug masaligan nga alternatibo ilabi na sa mga indigent nga mga pasyente.

Iya usab gi-hagit ang nagkadaiyang opisina sa lokal nga panggamhanan nga siguruhon ang paspas nga pagproseso sa mga rekisito haron nga dili na malangan ang uban pang mga proyekto.

Gipadayag usab niya nga andam na ang pondo sa rehabilitation sa Public Market sa Brgy. Libertad nga gikan sa nasyonal nga gobyerno. Sa kasamtangan, kamulo na ang procurement process alang sa maong proyekto.

Dugang pa ni Mayor Lorenzo, angay nga sutaon ang kapasidad sa mga negosyante pinaagi sa puhunan, kahanas, ug supply sa mga produkto nga ibaligya haron nga mahimong malamboon ang merkado.

Kahibaloan usab nga gisugdan na ang pagtukod sa Manuto bridge, pinaagi sa pondo nga nabawi ni Mayor Lorenzo. Gi-planohan ug gi-pondohan na usab ang pag-rehabilitate sa Lowan-Lowan Spring Resort, haron nga maka-likay ang mga bisita sa aksidente. Paninguhaan usab nga himoan nga Olympic-sized swimming pool nga mahimong gamiton sa mga swimming competition ug practice.

Pipila lamang kini sa mga tumong ug tinguha sa administrasyong Lorenzo alang sa pag-siguro sa maharuhayon nga kinabuhi sa katawhan, kung diin makab-ot sa tanan ang mga higayon sa pag-asenso.