ABRIL 29, 2020 – Andam na gamiton ang Municipal Isolation Unit sa Quezon, Bukidnon nga magamit panahon kung adunay magpositibo sa COVID-19. Aduna kini 11 ka kwarto para sa mga pasyente, inubanan sa triage center, dressing room para sa frontliners, disinfection tent, ug sanitation and hygiene facilities.

Nahimutang duol sa Municipal Health Office (MHO) ang Isolation Unit, aron kanunay ma-bantayan ug ma-atiman sa mga doktor ang pasyente, kung aduna man.

Preparado na usab ang mga Personal Protective Equipment (PPE) nga gipondohan sa lokal nga gobyerno sa Quezon sama sa surgical gloves ug non-sterile gloves, surgical goggles, face shields, coveralls, N95 masks, alcohol, ug thermal scanners. Gamiton kini nga mga ekipo sa mga medical frontliners sa MHO ug kabarangayan, ug mga enforcers aron kanunay sila maka-likay sa sakit.

Bisan pa man gipangandaman na tanan mga kabtangan ug lakang nga gi-kinahanglan batok sa COVID-19, naghinaot si Mayor “Poling” Lorenzo nga dili kini ma-gamit, ug dili makasulod ang virus sa lungsod, hinungdan nga padayon ang pagpatuman sa General Community Quarantine.