HULYO 16, 2019 – Gumikan sa tahas sa pag-amuma sa kinaiyahan para sa sumusunod nga henerasyon, gi-mugna ni Mayor “Poling” Lorenzo ang usa ka Plastic Waste Management Task Force.

Tutokan sa maong Task Force ang pagpa-uswag sa pamaagi sa koleksyon ug recycling sa Quezon, aron sa pagpa-kunhod sa plastic nga basura nga naka-kalat sa mga kalsada ug watershed, nga posibleng muabot sa kadagatan.

Pangunahan pud sa Plastic Waste Management Task Force ang pag-kolekta sa plastik nga basura, pag-plano para sa pag-kontra sa plastic pollution sa 31 ka barangay sa Quezon, Bukidnon, ug pagpahibalo sa katawhan kabahin sa kadaotan nga dala sa single-use plastics.

Matod pa sa usa ka survey sa Ocean Conservancy ug McKinsey Center for Business and Environment kaniadtong 2018, ang Pilipinas ang ika-3 nga pinakadako nga nag-dugang sa plastic pollution sa kadagatan.

Naninguha ang LGU, sa pagdumala ni Mayor Lorenzo, nga mapaubsan ang plastik nga basura—ilabi na sa mga landfill—haron nga dili kini muabot sa kadagatan, ug ma-protektahan ang gasa sa kinaiyahan para sa sumusunod nga mga henerasyon.