OKTUBRE 24, 2019 – Gi-awhag ni Mayor “Poling” Lorenzo ang kabililhon sa malinawon nga komunidad sa kapitanes sa 31 ka barangay sa Quezon, Bukidnon sa gipahigayon nga panaghisgot kabahin sa programa sa Balik-Loob.

Matod pa niya, ma-angkon sa matag-pamilya ang higayon nga mu-uswag kung mawala na ang mga bahad sa ilang kinabuhi.

Sa maong panagtapok, gi-tahasan sa 88th Infantry Battalion (88IB) ang tanang opisyales sa Quezon nga mag-mugna ug Balik-Loob Assistance Center kauban ang mga focal person (mga opisyales sa barangay, IPMR, SK officials, ug religious sector). Sila ang gihatagan og katungod sa pagdawat ug pag-endorso sa mga kanhi sakop ug ka-alyado sa New People’s Army (NPA) nga mi-tahan sa ilang kaugalingon ngadto sa mga otoridad.

Namugna ang assistance center pinaagi sa pagpatuman sa Executive Order 70 (EO 70), o End Local Communist Armed Conflict (ELCAC) aron padayon ang pagkawala sa mga terroristang grupo. Inubanan sa atong LGU sa Quezon, tumong niini ang pag-giya sa mga surrenderees sa saktung dalan para sa ilang kaugmaon sa umaabot.

Kahinumdoman nga dul-an 500 surrenderees sa NPA, Militia ng Bayan (MB), ug Mass Supporters ang nagsurrender sukad kaniadtong Enero 2019. Matod pa ni Lt. Col. Franklin Fabic, Commanding Officer sa 88IB, lumad ang siyam sa 10 ka surrenderees.

Usa ka dakong babag sa pag-asenso sa matag-pamilya ang mga bahad sa mga komunistang grupo. Mag-sumikad sa kahapsay ug kalinaw ang kalamboan sa Quezon, Bukidnon.