Ang pagpanalipod sa mga watershed areas ug kakahoyan sa kabukiran adunay dakong bili sa pagsiguro sa maayong kaugmaon sa katawhan.

Mao kini ang gipadayag ni Mayor “Poling” Lorenzo, atol sa gipahigayon nga panagtigum sa mga personahe sa Department of Environment and Natural Resources (DENR) Region X nga girepresentar ni Mr. Allan Flores, ug sa Community Environment and Natural Resources Office (CENRO) nga girepresentar ni Mr. Virgilio Batocail, OIC – CENRO; ug sa Quezon, Bukidnon Water District (QBWD) pinanguhanan ni General Manager Rafael Francisco.

Sa maong panagtigum, nahisgotan ang mga plano alang sa pagpreserbar sa watershed areas sa Mikatin Range, Brgy. Magsaysay, Brgy. San Roque, Brgy. Linabo, ug Brgy. Lipa; ilabi na sa Mount Tangkulang, kung diin naggikan ang tubig sa tulo (3) ka dagkong sapa.

Gisaysay sa DENR ang ilang mga kalihokan sa mga milabay nga bulan, ilabi na sa pakighinabi sa mga Lumadnong lumulupyo sa maong mga lugar, sa pagsuta sa kahimtang sa watershed areas, ug sa paghimo og plano alang sa pagpreserbar niini.

Matod usab ni Mayor Lorenzo, kinahanglan nga masuta ang maong mga watershed areas aron mapaabot kini sa Kongreso ug madeklara isip mga protected area, aron adunay legal nga basehan sa pagprotektar niini.

Nakig-alayon ang lokal nga panggamhanan sa Quezon, Bukidnon sa DENR ug sa QBWD aron masiguro nga adunay malahutayon nga water supply para sa mga sumusunod nga henerasyon, ug matagaan og maayong kaugmaon ang katawhan.