MARSO 1, 2020 – Sa pagsulod sa bulan sa Marso 2020, gi-kalipay sa mga drayber sa bao-bao ug motorela ang gipamahayag ni Mayor “Poling” Lorenzo nga mga tinguha sa iyang administrasyon, atol sa gipahigayon nga dialogue uban ang transport sector.

Pinaagi sa memorandum circular 2020-36 sa Department of Interior and Local Government (DILG), gi-tahasan ang mga lokal nga panggamhanan nga ipahugot ang pag-bawal sa mga bao-bao ug motorela sa national highway, apan mahimong ma-implementar lamang kini kung adunay lain nga ma-agihan sa mga sakyanan.

Gumikan niini, tugutan nga makagamit sa highway ang maong mga sakyanan, apan gi-awhag ang mga bao-bao o motorela nga gamiton lamang ang tuong bahin sa dalan.

Gipadayag usab ni Mayor Lorenzo ang pangandoy sa iyang administrasyon nga maghimo og internal road network kung diin maka-biyahe ang mga motor, bao-bao, ug motorela nga luwasnon ug paspas.

Gi-dugang pud niya ang plano sa pag-mugna ug pag-pasa sa usa ka ordinansa sa franchising sa mga bao-bao, haron maplastar ang mga drayber ug ang pletehan.

Aduna usab gi-plano nga tukuron nga terminal para sa mga public utility vehicles sa Freedom Park, kung diin sa kasamtangan nahimutang ang stage. Ibalhin ang maong stage sa pikas nga bahin dapit sa highway, ug ibutang ang terminal sa luyong bahin.

Mapasalamaton ang mga presidente sa asosasyon sa mga motorista kay matod pa nila, gi-tagaan sila og pagtagad ni Mayor Lorenzo.