Gipakanaog ang closure order sa duha ka poultry farm nga nahimutang sa Balangay 9, Poblacion, ug Brgy. Pinilayan. Naka-dawat ang munisipyo ug pipila ka reklamo kabahin sa maong mga poultry farm, ug sa pag-suta sa mga opisyales sa gobyerno, nasayran ang mga paglapas niini sa balaodnon.

Walay gipakita nga Mayor’s business permit ug sanitary permit ang mag tag-iya niining mga poultry farm. Ika-duha na kini nakadawat og notice gikan sa Municipal Health Office bahin sa mga pagsupak sa Sanitation Code ug uban pang mga balaodnon.

Matod pa sa mga residente duol niining mga poultry farm, adunay presensiya sa daghang langaw sa palibot, gani adunay higayon nga mangaon sila ilalom sa mosketero (mosquito net), haron lamang nga dili ma-patongan sa langaw ang ilang pagkaon.

Niabot usab ang presensiya sa langaw sa Lowan-lowan Spring Resort, gumikan sa kadaghan sa hugaw sa mga manok.

Nagdumili pud ang mga tag-iya sa maong mga poultry farm nga dawaton ang maong closure order. Gi-hatagan sila og 10 ka adlaw para hingloan, undangon, ug hawanan ang mga poultry farm.