HULYO 27, 2020 – Pagatutukan sa lokal nga panggamhanan sa Quezon, Bukidnon ang nutrisyon sa kabataan sa 31 ka barangay, ug paninguhaan niini nga modako sila nga himsog, kusgan, taas, ug adunay hanas aron matagamtam niini ang competitive advantage.

Kini nga pamahayag gipaabot ni Mayor “Poling” Lorenzo atol sa gipahigayon nga emergency meeting sa Quezon, Bukidnon Federated Women’s Office sa Wellness Center.

Matod niya, nag-gahin ang munisipyo og pondo nga two million alang sa feeding program, kung diin sulod sa first 1000 days sa kinabuhi sa mga bata, makasinati sila sa maayong panglawas ug masiguro ang maayo nga kaugmaon nila. Gilangkoban usab sa maong programa ang pagsuta ug pagtimbang sa mga kabataan sa matag-barangay aron makuha ang datos kung pila gyud ang nagkinahanglan og dugang nutrisyon.

Nanawagan usab si Mayor Lorenzo sa mga ginikanan sa pagluto ug pagpakaon sa sustansyadong mga pagkaon sama sa utanon sa mga bata aron ilang matagamtam ang kahimsog dili lamang sa lawas kung dili apil sa utok.

Sa hinapos, iyang gipaambit nga bisan pa man wala nakasulod ang COVID-19 sa lungsod, nagpabilin kini nga andam sa pagbatok niini. Padayon ang magmugna sa dugang mga washable face masks aron ipang apod-apod sa katawhan, sa katuyoan nga magpabilin ang tanan nga luwas sa virus.