MAYO 27. 2020 – Sa iyang pakig-hinabi sa mga kapitanes sa 31 ka barangay sa Quezon, Bukidnon, gi-butyag ni Mayor “Poling” Lorenzo nga gi-dayeg ug gi-himong modelo ang Quezon, Bukidnon, human mo-pasar ang Isolation Facilities niini sa mga standard sa Department of Health (DOH).

Atol kini sa gipahigayon nga emergency meeting sa Wellness Center.

Gidugang niya nga naglampos ang Quezon dili lamang sa compliance, kung dili sa pag-pangandam batok sa COVID-19.

Matod usab ni Mayor Lorenzo, huna-hunaon na lang nato tanan nga virus anaa lamang sa palibot. Isip pagpaniguro, kinahanglan batasanon ang pagsuot sa face mask kung mugawas sa panimalay, batunan ang physical distancing kung adunay ka-istorya, ug kanunay tumanon ang proper hygiene.

Iya usab gidugang nga angay natong anaron ang atong kaugalingon matag karon ug unya alang sa SIGURADONG PAGPANGINABUHI. Dili pa nato mabalik ang normal nga pagkinabuhi gumikan kay wala pay bakuna sa COVID-19.

Kahinumdoman nga gi-andam ang mga isolation facilities sa matag-barangay sa Quezon, Bukidnon, aron temporaryong kahimutangan sa mga tawo nga kinahanglan mag-agi sa 14-day quarantine period, sama sa mga residente nga mi-uli gikan sa mga lugar nga apektado sa COVID-19.

Kanunay andam ang lokal nga panggamhanan sa Quezon, Bukidnon sa pagbatok ug pagresponde sa COVID-19.