HUNYO 18, 2020 – Gipadayag ni Mayor “Poling” Lorenzo nga padayon nga mo-lihok ang lokal nga gobyerno sa Quezon, Bukidnon taliwala sa gi-atubang nga bahad sa COVID-19, dili lamang sa pagsaulog sa Araw ng Quezon, kung dili sa mga proyekto nga gipanaad sa katawhan. Matod pa niya, dili dapat mahimong babag sa kalamboan ang pandemya.

Atol kini sa gipahigayon nga pagsaulog sa ika-54 nga Araw ng Quezon sa Munisipyo sa Quezon, Bukidnon.

Sa iyang opening address, gisaysay ni Vice Mayor Joseph Durotan Sr. ang iyang mga kaagi isip lumulupyo sa Quezon kaniadto. Gi-dugang usab niya nga angay ipa-ambit sa katawhan ang tinuod nga kasaysayan sa lungsod.

Gidayeg usab ni Municipal Councilor Restituto “Rey” Baguio ang Guest of Honor nga si Board Member Benito Baguio, sa iyang pagpanerbisyo isip usa ka legislator gikan sa Lungsod sa Quezon hangtod sa Probinsiya sa Bukidnon.

Sa pamahayag ni Board Member Baguio, iyang gi-dayeg si Mayor Lorenzo sa dakong kausaban sulod lamang sa pipila ka bulan nga pagpanerbisyo, ilabi na sa pagbawi ang Government Property nga Road Right of Way (RRW) ug pagpahapsay ang mga kadalanan, ug sa insaktong pag-andam sa lungsod aron makalikay kini sa COVID-19.

Matod usab niya, nagpabilin nga luwas ang lungsod gumikan kay nagkahiusa ang katawhan sa pagbaton sa mga pamaagi sa paglikay sa virus.

Mitambong sab sa maong selebrasyon si Bukidnon Third District Representative Manuel “Manoy” Zubiri. Matod pa niya, kinahanglan tagaan og dakong importansya ang agricultura kay kini ang makadugang palambo dili lamang sa ekonomiya sa lungsod kung dili sa tibuok Bukidnon.

Sa hinapos, gitimbaya ni Municipal Councilor Nilo Bardon ang lungsod sa ika-54 nga Araw ng Quezon.

Gibatunan ang minimum health standards sa maong panagtigum, sama sa physical distancing, pagsuot sa face masks, ug kahinlo.