NOBYEMBRE 17, 2019 – Gi-kalipay sa 412 ka pamilya nga temporaryong naga-puyo sa Bulakanon Elementary School Campsite, Makilala, Probinsiya sa Cotabato ang gi-hatod nga relief goods sa lokal nga panggamhanan sa Quezon, Bukidnon isip ayuda sa mga biktima sa linog.

Nakadawat og banig, habol, ug hygiene kits ang halos 1,400 ka residente sa Brgy. Bato, nga gi-deklarang “no-build zone” sa Emergency Operation Center (EOC). Nasinati ang dagkong danyos sa maong barangay gumikan sa sunod-sunod nga linog ug aftershocks kaniadtong Oktubre.

Gi-langkoban sa Municipal Disaster Risk Reduction and Management Office (MDRRMO) nga gipangulohan ni Mr. Paul Abalde, inubanan sa Sangguniang Kabataan Federation nga gipangunahan ni Hon. Leze John Adam Densing, Municipal Mayor’s Office, ug Aktibong Kabatan-onan sa Quezon (AKQu) ang maong pagpangapod-apod sa relief goods.

Gikalipay ni Mayor Poling Lorenzo ang maong pag-ayuda, ilabi na nga matagamtaman usab ang kalipay usab pinaagi sa pag-tabang sa mga nanginahanglan.

Matod pa ni Councilor Densing, nasayran niya ang kalig-on sa komunidad sa Makilala, kung diin nag-tinabangay ang kinatibuk-an. Naghinaot usab siya nga ipadayon ang pagpakabana sa kabatan-onan, ug iyang gipasalamatan si Mayor Lorenzo sa pag-suporta sa maong relief operation.