ABRIL 17, 2020 – Gi-sugdan pag-usab ang Pito-pito (7-7) Kampanya Kontra Dengue sa lokal nga gobyerno sa Quezon, Bukidnon aron mapugngan ang pagsaka sa mga kaso sa sakit sa dengue.

Kini nga inisyatibo langkuban sa matag-semana nga pagpangyabo ug paghinglo sa mga lugar nga posible nga ma-itlogan sa mga lamok. Pinaagi niini, mahimong mamatay ang mga waya-waya ug mapugngan ang pagdaghan sa mga lamok nga nagdala sa sakit sa dengue.

Kahinumdoman nga gipasiugda kining lakang kaniadtong Hulyo 2019 sa tunga-tunga sa panahon sa ting-ulan, kung diin nasayran nga midaghan ang kaso sa dengue sa lungsod. Pinaagi sa maong inisyatibo, mikunhod ang mga kaso sa dengue hangtod sa bulan sa Setyembre, apan matod pa ni Mayor “Poling” Lorenzo, mas mahimong epektibo ang kampanya kontra dengue kung pagasugdan kini sa wala pa nagsugod ang ting-ulan.

Gipangunahan ni Municipal Sanitation Inspector Victor Garcia ang pagkolekta sa datos ug pagsuta sa mga potensyal nga itloganan sa mga lamok sa mga barangay. Magpadayon usab ang sinemana nga pagpanghinglo sa matag-barangay aron nga magmalampuson ang maong lakang.