MAYO 27, 2021- Giaghat ni Mayor Poling Lorenzo ang Linabo United Farmers Association (LUFA) nga ipadayon ang ilang dedikasyon nga mapalambo ang Pilot Project nga mao ang vegetables growing.

Kini ang makapadako sa ekonomiya sa lungsod ug makahatag nutrisyon sa katawhan sa lungsod.

Atol kini sa gipahigayon nga turnover sa 650 ka sako sa organic fertilizer, 130 sa inorganic fertilizer, 11 ka klase sa pesticide, assorted vegetable seeds, 146 ka knapsack sprayer, ug 146 ka rolyo sa polyethylene pipe ngadto sa LUFA.

Matod niya, karon nga gaubos na ang malnutrisyon, dako og ikatabang ang vegetable growing ilabi na kay presko ug sustansyado kini nga mga utanon.

Iya sab gidugang nga kinahanglan pagatun-an og maayo kung unsaon nga magresulta og maayo ang pagtanom niini kay nakita niya ang potential sa Brgy. Linabo gumikan sa area niini nga angayan para sa mga high value crops (Sweet pepper, Eggplant, String Beans, Squash, Bitter gourd, Peachay, Tomatoes, Carrots) ug uban pa.