AGOSTO 26, 2021 – Giayudahan sa lokal nga gobyerno sa Quezon, Bukidnon ang duha (2) ka menor de edad nga 15 ug 16 anyos nga narescue gikan sa New People’s Army (NPA). Anaa sila karon sa kustodiya sa 88th Infantry Battalion.

Nakadawat ang duha ka batan-on og food packs gikan sa Municipal Social Welfare and Development Office (MSWDO). Ato sab silang gisuta aron mahibaw-an kung unsa pa ang ilang mga panginahanglanon.

Gipaagi usab sila sa stress debriefing, aron mahupayan sila sa ilang mga naagian sa kamot sa mga NPA.

Matod nila, nasulod sila sa maong kalihokan kay giilad sila pinaagi sa mga saad. Gihimo sab silang regular nga myembro sa teroristang grupo.

Dugang pa nila, nahiagoman gayud nila ang kalisod sa ilang kahimtang busa nagkurso sila nga makagawas sa maong kalihokan.

Sa karon, gusto na nila nga mutiwas sa pag-eskwela ug magpuyo nga malinawon ug malipayon kauban ang ilang pamilya.

Atong gisiguro nga magiyahan sila sa insakto ug matagaan sila sa kahigayunan nga makab-ot ang ilang gipangandoy nga maayong kaugmaon.