ABRIL 14, 2021 – Gidasig ni Mayor “Poling” Lorenzo ang mga Kapitanes sa 31 ka barangay sa Quezon, Bukidnon sa ka bililhon sa pagpabakuna, atol sa ilang binulan nga ABC meeting.

Matod sab niya, dili ta magpanic pero magmatngon ug mangandam kung adunay emerhensya aron makapadayon ta sa pagpanginabuhi.

Gipadayag niya nga ang COVID-19 sayon ra tambalan kung maatiman, busa gisiguro sa lokal nga panggamhanan nga protektado ug nabakunahan ang mga frontliners ilabi na ang mga Barangay Health Workers (BHW) nga kabahin sa mga Barangay Health Emergency Response Teams (BHERTs) kay sila ang muatubang kung naay emerhensya nga muabot sa lungsod.

Gi-awhag sab niya sila nga mag andam sa pagbakuna ug magmatngon perme aron malikayan ang pagkuyanap sa COVID-19 dinhi sa lungsod ug dili mahimong sama sa mga lugar nga gadaghan ang positibong kaso.

Gipalawoman pa ni Dra. Lea Paula Catalan, Asst. Municipal Health Officer, nga ang pagpabakuna usa ka dakong tabang sa pagprotektar sa kaugalingon ug sa pamilya sa bahad sa COVID-19.