MAYO 17, 2021 – Gikasubo kaayo sa Munisipyo sa Quezon, Bukidnon ang pagpanaw ni Hon. Councilor Restituto “Rey” R. Baguio ganihang buntag sa may alas 8:55, Mayo 17, 2021 sa edad nga 53.

Gipanganak siya kaniadtong June 10, 1967 isip kinamagulangan nga anak nila Hermenegildo U. Baguio ug Gregoria R. Baguio.

Migradwar siya sa elementarya sa Quezon Central Elementary School ug sekondarya sa Nuestra Señora del Pilar High School. Nakab-ot niya ang iyang Bachelor of Science in Civil Engineering sa Cagayan de Oro College. Nahuman sab niya ang Dairy Production nga vocational course sa Central Mindanao University. Nakuha sab niya ang Master’s Degree sa Curricular Practical Training sa Quezon Institute of Technology.

Sa iyang paglingkod isip Konsehal sa lungsod kaniadtong 2016 ug usab sa 2019 hangtod karon, nasayran na ang iyang nahimong mga tabang alang sa katawhan ug serbisyo sa lungsod. Nagsilbi siya nga chairman sa Committee on Engineering and Public Works; Committee on Agriculture and Cooperatives; ug Committee on Housing, Urban Development, Land Zoning, and Classification. Daghan sab nga mga proyekto ug programa ang iyang gidala nga makaayo sa kahimtang sa pagtuon sa mga kabataan isip Quezon National High School PTA President ug Division of Bukidnon PTA President.

Sa wala pa siya nahimong Konsehal sa lungsod sa Quezon, Bukidnon, nahimo siyang Draftsman sa Quezon Municipal Engineering Office ug nagserbisyo sab siya isip Barangay Kagawad sa Poblacion gikan 2007 hangtod 2016.

Gipaabot sa Munisipyo sa Quezon ang pahasubo sa iyang pamilya: kang Mrs. Beverly A. Baguio, ug ilang mga anak nga sila Nash Dominique Baguio; Clyde Joseph Baguio; ug Gwennaelle Kristie Baguio.

Siya usa ka matinahuron nga anak ug mapinanggaon nga bana ug amahan sa iyang pamilya. Dili sab masukod ang iyang tinguha sa matinud-anon nga pagserbisyo sa komunidad sa iyang yutang natawhan.