GINA TUMAN NA ANG SIX LANES!

Padayon ang pagsemento sa outer lanes sa 2.3km nga bahin sa highway (Bukidnon-Davao Road) nga moagi sa Brgy. Poblacion, Quezon, Bukidnon, sa tumong nga mahimong hapsay, malinawon, ug luwasnon ang pagbyahe sa kadalanan.

Kini nga lakang angay gayud nato ikalipay. Dakong tabang kini sa ga-usbong nga ekonomiya sa lungsod kay usa sa timaan sa malambuon nga lungsod ang hapsay ug lapad nga dalan.

Sa pakiglambigit ni Mayor Poling Lorenzo sa nasyonal nga gobyerno, nasiguro niya nga maapil sa national budget ang pagpasemento sa six lanes sa Quezon karong tuig.

Nagsugod usab ang atong pagpangandam niini kaniadtong tuig 2019, kung diin atong gihawan ang dalan aron mahimo kining lapad ug makabiyahe ang mga sakyanan nga walay babag.

Karon, nagbunga na gyud ang atong pagtinabangay ug pagpaningkamot. Ang maong proyekto gipondohan sa national nga gobyerno sa kantidad nga Php139,872,000, natuman pinaagi sa koordinasyon sa Department of Public Works and Highways (DPWH) ug sa lokal nga panggamhanan sa Quezon, Bukidnon.