AGOSTO 17, 2021 – “Kombinsihon gayud nato ang mga tigulang nga magpabakuna. That way, we will have less problems kay sila man gayud ang una nga maigo, sila man gyud ang naay danger, mao nay gitawag nga vulnerable.”

Mao kini ang gihingusgan ni Mayor Pablo “Poling” Lorenzo atol sa gipahigayong Sangguniang Kabataan (SK) Federation monthly session.

Giawhag niya ang mga lideres sa kabatan-onan sa kada barangay nga maoy manguna sa paghimo ug lakang aron sa pagkumbinsir sa mga katigulangan nga magpabakuna, kay kung protektado na ang mga sektor nga giingong vulnerable, mahimong makalihok na kita nga walay pagduha-duha.

Taliwala niining pandemya, kadaghanan sa mga nagbati og ngilngig na komplikasyon ug namatay gumikan sa COVID-19 mga senior citizens ug mga tawo nga adunay balatian. Sa pikas bahin, sayran nga dili madutlan sa sakit ang mga batan-on, apan posible nga magdala sila og sakit pag-uli sa panimalay. Kini hinungdan nga gidili usa ang face-to-face classes ug major gatherings.

Gikasubo ni Mayor Lorenzo nga napugos ang mga estudyante nga magtuon pinaagi sa online classes imbis sa naandan nga face-to-face nga klase, nga maoy pinakaepektibo nga pamaagi sa pagtuon, tungod kay nahadlok kita nga matakdan sa COVID-19 ang mga tawong vulnerable sulod sa atong mga panimalay.

Matod niya, kung magpadayon pa kini, posible nga adunay henerasyon sa magtutuon nga maulahi. Kini sukwahi sa tumong niya nga makabaton og competitive advantage ang mga batan-on sa Quezon.

Gipatin-aw ni Mayor Lorenzo nga kung makab-ot na ang giingong herd immunity, kung diin protektado na ang kadaghanan kanato ilabi na ang mga vulnerable nga tawo, makapadayon kita nga manginabuhi nga normal ug insakto.

Gilakip niya nga makatabang usab ang pag report sa tawo’ng mamatikdan nga adunay sintomas sa sakit ngadto sa Barangay Health Emergency Response Team (BHERT) aron maatiman. Nanawagan usab siya sa padayong paglikay sa panagtapok, ug pagsunod sa safety protocols.