MARSO 19, 2021 – WALAY ANGAY IKABALAKA SA BAKUNA.

Mao kini ang gipamahayag ni Dra. Lea Catalan, Asst. Municipal Health Officer atol sa simulation activity nga gipahigayon sa lokal nga panggamhanan sa Quezon, Bukidnon ug sa Department of Health (DOH) Bukidnon isip pagpangandam para sa pagbakuna sa mga nakatala nga priority persons sa lungsod.

Matod ni Dra. Catalan, nga nakadawat na sa unang dose sa bakuna sa AstraZeneca, dili angay ikahadlok ang pagpabakuna kay kini maghatag og proteksyon sa imong lawas batok sa COVID-19. Pinaagi niining bakuna, mas mapalig-on ang immune system sa tawo ug mapugngan ang pagkatay sa virus sulod sa lawas.

Iya sab gidugang nga dili angay ikahadlok ang side effects, sama sa hilanat ug pagkaluya human makadawat sa bakuna, kay kini timailhan nga ang immune system nagresponde sa bakuna.

Gihagit usab ni Ms. Emmanuelita Barrera sa DOH Bukidnon ang mga Barangay Health Workers nga sila mobarog isip maayong modelo sa pagpabakuna, aron dili mahadlok ang ilang kasilinganan ug maprotektahan na ang mga lumulupyo sa lungsod.

Nangandam ang lokal nga panggamhanan sa Quezon, Bukidnon sa pagpabakuna, segun sa giya sa nasyonal nga gobyerno. Karong semana, gisugdan na usab ang pagbakuna sa health workers ug emergency responders sa lungsod, nakadawat na sa unang dose sa AstraZeneca ang 69 ka health workers ug emergency responders sa Quezon isip pagpatuman sa National Vaccination Program.

Pinaagi sa pagpabakuna, matagamtam nato ang giingon nga “herd immunity” kung diin protektado na ang kadaghanan sa bahad sa COVID-19, ug dili na kini mokuyanap.