SETYEMBRE 16, 2021 – Gipaabot sa katawhan sa Quezon, Bukidnon ang tiunay nga pasalamat kay Presidente Rodrigo Duterte sa paghatag og pagtagad sa mga kaayohan nga dugay na natong gipangandoy.

Kini atol sa gipahigayon nga groundbreaking ceremony sa Brgy. Delapa, kung diin ipasemento ang usa ka Farm-to-Market Road pinaagi sa End Local Communist Armed Conflict (ELCAC) nga programa sa nasyonal nga gobyerno.

Kaniadtong 2020, nakadawat og proyekto nga mokantidad P20M ang matag usa sa Brgy. Cawayan, Delapa, Kipaypayon, Linabo, Lipa, Palacapao, ug Sta. Felomina (P140M sa kinatibuk-an), gikan sa maong programa sa kalinaw. Kini nga pondo gamiton aron mapasemento ang dalan, nga agihanan sa mga tawo ug produkto sa maong mga barangay.

Sa maong seremonyas, gipanghingusgan ni Mayor Poling Lorenzo nga dakong tabang ang pagsemento sa maong mga dalan dinhi sa lungsod. Kung naay saktong dalan, dali na ang paggawas sa mga produkto sa mga mag-uuma.

Kini alayon sa tinguha sa atong lokal nga panggamhanan sa pagsiguro sa maayong kadalanan sulod sa lungsod. Magsumikad dinhi ang usa ka mabungahon nga ekonomiya nga magdala sa haruhay nga pagpanginabuhi.

Mitambong usab sa maong groundbreaking si Department of Interior and Local Government (DILG) X Regional Director Arnel Agabe, ug mga personahe sa Probinsiya sa Bukidnon, mga kasundalohan sa 1003rd Infantry Brigade ug 3rd Infantry Battalion, Philippine National Police (PNP), Philippine Information Agency (PIA), ug mga opisyales sa Brgy. Delapa ug Sta. Felomina.