HULYO 15, 2021 – Mapasalamaton ang lokal nga panggamhanan sa Quezon, Bukidnon ngadto sa Bukidnon State University (BukSU), sa pagdugang sa mga opportunidad nga makaskwela sa kolehiyo ang atong mga lungsuranon.
Atol kini sa gipahigayon nga groundbreaking ceremony sa pagatukuron nga three-storey building sa BukSU Quezon Satellite Campus.

Kini alayon sa tinguha sa lokal nga panggamhanan sa Quezon, Bukidnon nga masiguro nga makapadayon sa pag-skwela ang mga magtutungha, aron mapalapdan pa ang ilang kaalam ug makab-ot nila ang competitive advantage.
Matod ni Mayor “Poling” Lorenzo, gipanghingusgan gayud niya ang pagdugang og mga pasilidades ug mga higayon (opportunities) nga moasenso ang katawhan. Ang pagtukod sa school building sa BukSU usa ka dakong tabang sa pagkab-ot niining pangandoy.

Matod usab ni Municipal Councilor Jerly “Jay” Areja, “Basta edukasyon, prayoridad sa Quezon!”
Kahinumduman nga nagpadayon ang pagtukod sa mga Integrated Schools sa mga kabarangayan aron makapadayon sa pagskwela ang mga estudyante bisan pa sa mga hilit nga barangay.

Nasayran usab ang mga programa sa lokal nga gobyerno sa Quezon alang sa pagpadayon sa edukasyon sa lungsod taliwala sa pandemya, sama sa pagsuporta sa Brigada Eskwela ug pagprinta sa self-learning modules, ug ang mga lakang nga Kaabag sa PagSKwela ug Computer Literacy Program.

Gitambongan kini nga Groundbreaking Ceremony ni Mayor Lorenzo, Councilor Areja, BukSU President Dr. Oscar B. Cabañelez, BukSU Director for the Satellite Campuses Dr. Albert Villanca, ug Campus In-Charge Mr. Daryl De Asis.