HUNYO 18, 2021 – Ang tiunay nga panaghiusa ang gikinahanglan para sa paglambo sa Quezon, Bukidnon.

Mao kini ang gipamahayag ni Mayor “Poling” Lorenzo atol sa gipahigayon nga hamubong seremonyas isip pagsaulog sa ika-55 nga Araw ng Quezon.

Gidugang ni Mayor Lorenzo nga kinahanglan nga magkasinabot ug maghiusa ang tanan sa kung unsay direksyon sa lungsod, ug sa mga lakang aron matagamtam ang atong panglantaw ug mga pangandoy para sa katawhan.

Nitambong usab isip Guest of Honor si Former Provincial Board Member ug Municipal Councilor Hon. Rodolfo Abaquita, Sr. Iyang gisaysay ang iyang mga kasinatian isip usa nga nagdumala sa lungsod, sugod sa iyang unang term kaniadtong 1980, hangtod sa iyang pinakaulahi nga term kaniadtong 2013.

Gi-aghat ni Hon. Abaquita si Mayor Lorenzo ug ang Sangguniang Bayan sa pagpanguna ni Vice Mayor Joseph Durotan, Sr. nga ipadayon ang serbisyo nga tiunay ug haom sa panginahanglanon sa katawhan.

Mitambong ug nipartisipar sa Flag Raising ug Offering of Wreaths sila Mayor Lorenzo ug Vice Mayor Durotan, inubanan nila Konsehales Jose Miguel Fortich, Teresita Leonardo, Nilo Bardon, Myrna Repalda, Clyde Baguio, SK Federation President Leze John Adam Densing, ug Municipal IPMR Elmer Lilawan; mga opisyales sa munisipyo, kapulisan, ug kabomberohan; Kapitanes sa 31 ka barangay sa Quezon; ug Laga ta Quezon 2021 Ms. Maria Eloisa Postrano.