PEBRERO 15, 2021 – Mapasalamatong gipadayag sa mga Lumadnong lideres sa Quezon, Bukidnon ang nasinati nga kalamboan, makanunayong pagsuporta, ug mga higayon nga gihatag sa lokal nga panggamhanan sa Quezon sa pagpreserbar sa mga tradisyon sa lumadnong kultura sa lungsod.

Kini atol sa gipahigayon nga ritwal alang sa tinuig nga Sunggod ta Kamanga nga gitambongan sa mga opisyales sa lokal nga panggamhanan nga gipangunahan ni Mayor Pablo Lorenzo III, ug ni Municipal Indigenous People’s Mandatory Representative (IPMR) Datu Elmer Lilawan inubanan sa mga Tribal Chieftain ug IPMR sa 31 ka barangay sa Quezon.

Mipadangat si Mayor Lorenzo nga samtang naglambo ang lungsod, kinahanglan dili mabiyaan ang Lumadnong kultura. Iya sab gidugang nga padayon gihapon sa Siguradong Pagpanginabuhi pinaagi sa pagbaton og PALAYO, TABON, HUGAS, ug HINLO aron malayo sa sakit.

Kini nga kalihokan gimugna aron mapasundayag ang kultura ug panginabuhi sa mga Manobo nga lumulupyo sa Quezon, Bukidnon. 

Kaniadtong 2019, gihimong pormal ang pagsaulog sa Sunggod ta Kamanga matag unang Lunes ug Martes sa Pebrero pinaagi sa Municipal Ordinance 2019-14.

Apan wala napahigayon ang dako nga festival nga naandan taliwala sa pandemya nga atong giatubang, wala giyapon gipakyas ang pagpalawom ug pag-obserbar sa diwa niini.