SETYEMBRE 28, 2021 – Gipanghingusgan ni Mayor Poling Lorenzo ang kabililhon sa pagpabakuna kontra sa COVID-19.

Kini atol sa gipahigayon nga Public Hearing nga gipangunahan sa Sangguniang Bayan nga gipangulohan ni Vice Mayor Joseph Durotan, Sr., mahitungod sa Proposed Municipal Ordinance, kun giingon “Siguradong Pagpanginabuhi Ordinance”, kung diin gihisgutan ang mga balaod nga gipanday isip paglikay sa pagkaylap sa COVID-19.

Matod niya, kung makapabakuna na ang kadaghanan kanato, mahimo nga makabalik kita sa naandan nato nga panginabuhi, ug ang COVID-19 mahimong normal na lang nga balatian–busa dili gyud angay kahadlokan ang bakuna.

Ang giingong Public Hearing gitambongan sab sa Sangguniang Bayan members Councilors Robert Gue, Jay Areja, Jomic Fortich, Myrna Repalda, Clyde Baguio, Rodrigo Lumba, ug Adam Densing; mga Kapitanes sa 31 ka Barangay sa Quezon; mga opisyales sa mga nagkadaiyang mga opisina sa munisipyo; ug mga representante sa mga nagkadaiyang sektor nga adunay kalambitan sa maong gisugyot.