DISYEMBRE 2, 2019 – Gi-suta sa lokal nga panggamhanan sa Quezon, Bukidnon ang kahimtang sa 76 ka tawo nga gikan sa Brgy. Sta. Felomina nga gi-dala sa usa ka simbahan sa Iglesia Filipina Independencia sa lungsod sa Kitaotao, Bukidnon.

Nasayran nga pipila sa mga kabataan ang masakiton ug kinahanglan na ipahospital. Gi-ayudahan usab sa Municipal Health Office sa Quezon ug Kitaotao ang maong mga tawo pinaagi sa pagcheckup ug hatag sa tambal.

Pipila kanila ang mipadayag sa ilang kagustuhan nga muuli na gyud sa ilang pinuy-anan haron nga ma-atiman ang ilang pagpanguma ug kahayupan, makauban ang ilang pamilya sa ilang kaugalingong panimalay, panambalan ang ilang mga kabanay nga masakiton, ug manginabuhing normal ug malinawon. Apan bisan pa man sa ilang kagustuhan, adunay indibidwal nga dili residente sa Quezon ang ni-pugong sa ilang tinguha nga mopa-uli.

Kahinumdoman nga kaniadtong Nob. 28, 2019, gi-bisitahan sa Municipal Social Welfare Development Office nga gipangunahan ni Ms. Wena Pagayon ug Executive Assistant Junjun Alvarez ang nasangpit nga mga pamilya ngadto sa Malaybalay, diin una kining midangop, ug nakita nga aduna nay senyales ang mga kabataan nga magkasakit.

Gi-aghat ni Alvarez ug Pagayon nga muuli na sa ilang pinuy-anan tungod nga walay kamatuoran ang taho nga dunay pagahimuon ang militar nga pagpamomba. Gi-saad usab kanila nga ihatod sila sa Brgy. Sta. Fe pinaagi sa sakyanan sa munisipyo.

Apan kaniadtong Nob. 30, gi-sugat ang maong mga tawo sa sakyanan nga ilang gi-tuohan nga gipanag-iyahan sa munisipyo sa Quezon, nga mag hatod nila sa Brgy. Sta. Fe. Ilang gikahibulong nga nipadulong ang maong biyahe sa munisipyo sa Kitaotao, ug gipanaog sila sa maong simbahan.