HULYO 6, 2020 – Gi-aghat ni Mayor Poling Lorenzo ang tanan nga magtinabangay ngadto sa maayong pag-alima ug paghatag sa masustansya nga pagkaon ang mga kabataan aron makab-ot ang tumong nga mahimo kining “Taller, Healthier, Stronger, Bigger, ug Smarter”.

Atol kini sa ika-46 nga Launching sa Nutrition Month nga gitambungan sa 14th Sangguniang Bayan, gipangunahan ni Vice Mayor Joseph Durotan, Sr., mga Kapitanes sa 31 ka Barangay, Municipal Agriculturist Ms. Perlita Danlag, mga Midwife, Barangay Nutrition Scholars (BNS), ug Nutrition Staff.

Matod pa ni Ms. Danlag, samtang bata pa lang mahatagan na sa insaktong pag-alima ug sustansya ang mga kabataan aron himsog, lig-on ang resistensya, ug dili ma-apektohan ang pagtaas inig dako nila busa kinahanglan atimanon.

Gipadayag sab ni Mayor Lorenzo nga isa sa iyang programa ang patukod sa Municipal Garden aron mahatagan og semilya sa utanon ang katawhan para itanom sa ilang household garden ug matagamtaman ang presko ug libre nga utan, ilabi na kadtong abunda sa protein.

Iya sab gidugang nga kinahanglan matudluan ang mga ginikanan sa simple apan lamian ug insaktong pagluto sa mga pagkaon nga dili mawala ang sustansya.

Sa hinapos, iyang gi-dugang nga pina-agi sa insaktong pag-alima sa mga kabataan, sila ang kaugmaon ug makapalambo sa atong lungsod.