NOBYEMBRE 6, 2020 – Gipadayag ni Mayor “Poling” Lorenzo ang kabililhon sa hiniusang pagpaningkamot sa katawhan sa paglikay sa COVID-19.

Kini atol sa interview sa mga personahe sa Net25, kung diin gipaambit ni Mayor Lorenzo ang mga lakang nga gimugna sa lokal nga panggamhanan sa Quezon, Bukidnon aron mapanalipdan ang tanan.

Gipaningkamotan sa lokal nga panggamhanan sa Quezon nga mapasabot ang publiko bahin sa bahad sa virus, ug sa mga pamaagi sa pagbatok niini, busa nagtinabangay ang tanan aron mapugngan ang pagkaylap sa sakit.

Gipalig-on usab ang COVID-19 response sa Quezon pinaagi sa paghan-ay sa sistema sa pagresponde sa mga positibong kaso; pagsiguro nga adunay pondo ang kabarangayan alang sa mga panginahanglanon sa pag-atubang sa pandemya; pagandam sa mga isolation units sa munisipyo ug sa matag-barangay; sa pagpalit sa mga Personal Protective Equipment (PPE) ug alcohol; ug sa pagsiguro nga insakto lamang nga impormasyon bahin sa COVID-19 ang moabot sa katawhan.

Sa karon, adunay 34 ka kaso sa COVID-19 ang natala sa lungsod. Usa lamang ang aktibong kaso, samtang ang 33 nakarekober na.

Dugang usab ni Mayor Lorenzo, bisan pa man nakabati og kabalaka ang munisipyo, nagpabilin nga hugot ang pagpangandam niini.