OKTUBRE 25, 2019 – Walay angay nga kabalak-an ang mga katawhan sa Quezon, Bukidnon tungod ang atong kasundalohan ug kapulisan andam andam kanunay mo-siguro sa kalinaw sa katilingban ug sa siguridad sa katawhan, matod pa ni Acting Chief of Police Major Mitchel Clemencio.

Kahinumdoman nga adunay kusog nga pagbuto nga nasayran kaniadtong Huwebes, 7:40 sa gabii, sa luyo sa Quezon Municipal Police Station (MPS). Nabuslot ang atop sa mess hall sa istasyon ug nag-angkon ug dakong danyos ang usa ka kotse nga naka-park.

Base sa initial nga imbestigasyon sa Scene of the Crime Operation (SOCO) ug Explosive Ordinance Division (EOD), naka-diskubre sila og fragments sa Improvised Explosive Device (IED), nga sama sa nakumpiska nga IEDs sa New People’s Army.

Human sa pag-buto, direcho nga gi-suta ni Mayor “Poling” Lorenzo ang sitwasyon sa police station. Gi-hinabi usab niya ang kapulisan sa sunod nga buntag haron masayran ang resulta sa imbestigasyon.

Matod sa Provincial Director sa Bukidnon Provincial Police Office (BUKPPO), Police Colonel Roel Lami-ing, kini nga insidente posibleng panimalos batok sa PNP tungod sa pagtuman sa ilang responsibilidad ug hugot nga pagsuporta sa Executive Order 70 (EO 70) o End Local Communist Armed Conflict (ELCAC).

Sa gika-ingun ni Lieutenant Colonel Franklin Fabic, Battalion Commander sa 88th Infantry Battalion (88IB),ang maong insidente usa lamang ka diversionary tactic haron nga ma-lihis ang atensyon sa kapulisan ug kasundalohan.

Aduna pud sa PNP post-blast investigation si Police Lieutenant Colonel Ellen Avansado, Hepe sa SOCO-BUKPPO, ug si Police Lieutenant Colonel Arce Yam-oc nga Hepe sa OPN-BukPPO.

Nanawagan si Lt. Col. Fabic sa mga NPA nga naglihok pa hangtod karon nga mu-tahan sa sabakan sa Gobyerno.

Gi-kundena sa lokal nga panggamhanan sa Quezon, Bukidnon ang maong paglapas sa International Humanitarian Law, nga nag-mando nga dili hilabtan ang mga sibilyan, kauban na ang kapulisan.