ENERO 13, 2020 – Layo na ang naabot sa Quezon, Bukidnon kabahin sa kahapsay ug kalinaw, apan kinahanglan kini nga atimanon haron nga mo-lahutay kini sa dugay nga panahon.

Mao kini ang gipa-ambit ni Mayor “Poling” Lorenzo sa mga kapitanes sa kabarangayan sa Quezon, mga opisyales sa nagkadaiyang opisina sa gobyerno, kapulisan, kasundalohan, ug uban pang mga personalidad sa mga sektor sa gipahigayon nga Joint Meeting sa Municipal Development Council ug Municipal Peace and Order Council.

Atol sa Executive Order 70 o End Local Communist Armed Conflict (ELCAC), gi-mando ang mga lokal nga gobyerno nga i-mugna ang Task Force ELCAC nga gilangkuban sa nagkadaiyang ahensiya sa gobyerno, inabagan sa mga opisyales sa barangay. Mao kini ang mahimong magpadayon sa gi-tinguha nga pag-undang sa insurgency.

Gipadayag usab ni Lt. Col. Franklin Fabic, Commanding Officer sa 88th Infantry Battalion, ang kalampusan sa militar sa pagpakunhod sa suporta sa hiwi nga ideolohiya sa lungsod. Matod pa niya, wala na’y nabilin nga mga rebelde nga kumander ug sundalo sa Quezon.

Nahisgotan usab sa maong panagtapok ang pag-implementar sa Barangay Justice System, kung diin adunay tahasan ang barangay nga mag-resolba sa mga krimen sa kabarangayan. Mahimong makadawat kini sila og training og kumpletong ekipo para sa maong tahas.

Ni-hangyo si Municipal IP Mandatory Representative Hon. Eladio Lilawan nga maapil sa maong sistema ang Lumadnong pamaagi sa pag-husay, ug gi-uyonan kini ni Mayor Lorenzo.