HUNYO 12, 2020 – Sa kasaulogan sa ika-122 nga Nasyonal nga Adlaw sa Kagawasan (National Independence Day) sa Pilipinas, gipadayag ni Mayor “Poling” Lorenzo ang kabililhon sa edukasyon sa pagkamugna sa nasod. Matod pa niya, gumikan sa edukasyon sa mga bayani nga kagikan sa mga Pilipino, nakab-ot sa kagawasan sa nasod ug natun-an ang mga pamaagi sa pagdumala.

Pinaagi sa insaktong edukasyon, mapalambo pa ang mga pamaagi sa pagserbisyo sa katawhan. Magsumikad diri ang kalamboan dili lamang sa lungsod sa Quezon, Bukidnon, kung dili sa tibuok nasod sa Pilipinas, busa angay lamang nga paningkamotan nga ma-edukar ang tanan.

Kahinumdoman nga sa administrasyon ni Mayor Lorenzo, napa-tukod ang mga Integrated Schools sa Paitan, Magsaysay, Sta. Cruz, Kipolot, ug Gamot, timailhan sa iyang tinguha nga makab-ot sa kabatan-onan ang edukasyon aron maka-higayon sila nga mu-asenso.

Gipasalamatan usab ni Mayor Lorenzo ang mga frontliners sa ilang pagpaningkamot aron magpabilin nga luwas ang lungsod sa Quezon, Bukidnon sa COVID-19. Kahinumdoman nga gipangandaman sa Municipal Health Office (MHO) ang mga Barangay Isolation Units ug Municipal Isolation Unit, ug hugot nga gi-bantayan ang tanan mga returning residents sa Quezon, Bukidnon. Gipangunahan usab sa Municipal Public Safety Office (MPSO) ang pagpatuman sa mga balaodnon aron mabatunan ang mga pamaagi isip paglikay sa virus.

Gipaambit usab ni Vice Mayor Joseph Durotan ang diwa sa pagka-Pilipino: ang paghigugma sa isig ka tawo, sa nasod, sa kinaiyahan, ug ilabi na sa Labawng Makagagahum.

Sa iyang hinapos nga mensahe, gi-uyonan ni Councilor Jerly Areja, Chairman sa Committee on Education, Skills Training, and Livelihood ang pamahayag ni Mayor Lorenzo bahin sa importansya sa edukasyon.

Sa maong seremonyas, gi-batunan ang health standards sama sa pagsuot sa face mask, physical distancing, ug kahinlo sa panglawas ug sa palibot.