Sa tinuig nga pagsaulog sa piyesta ni Patron Nuestra Señora del Pilar sa tuig 2019, nasinati sa katawhan sa Quezon, Bukidnon ang pagka-bibo, ilabi na sa gipahigayon nga Kiokong Octoberfest, nga gi-tambongan sa halos 25,000 ka tawo kaniadtong Sabado.

Nag-hugyaw ang mga ni-duyog sa mga konsiyerto, nga adunay mga nagkadaiyang nasyonal nga mga performers sama sa komedyante nga si K-Brosas, ug si Jimboy Martin nga sakop sa grupo sa mananayaw nga “Hashtag Dancers” ug dumadaog sa Pinoy Big Brother Teen Edition. Aduna usab mga lokal nga mga performer sama sa Kagay Band, Winset Jacot, Inside City Band, ug Duchess in Throne.

Gipanghingusgan ang kalinaw sa maong kalihokan pinaagi sa paningkamot sa Public Safety Department, inubanan sa 88th Infantry Battalion, Philippine National Police, ug Bureau of Fire Protection.

Kahinumdoman nga gisugdan og mugna ang nagkadaiyang mga kalingawan kaniadtong termino ni Mayor Lorenzo isip Bise Mayor, og mo-padayon pa kini sa umaabot nga mga tuig.