OKTUBRE 16, 2019 – Gi-dayeg ni National Economic Development Authority (NEDA) Region 10 Director Mylah Faye Aurora V Cariño, CESO III, ang ka-kugi ni Mayor “Poling” Lorenzo sa pagsiguro nga mapatuman ang proyektong maghatag sa pag-uswag sa iyang lungsod, ilabi na sa pagpa-ayo sa tulay sa Brgy. Manuto nga mokabat P90M.

Kahinumdoman nga naguba ang tulay nga tabokanan sa Brgy. Manuto gumikan sa Bagyong Vinta kaniadtong hinapos tuig 2017. Human sa pagka-delatar sa maong proyekto, gipa-subay ni Mayor Lorenzo ang status niini haron mapatuman kini pinaagi sa Department of Public Works and Highways (DPWH). Mahimong ipahigayon ang bidding sunod semana.

Sa gipahigayon nga monthly meeting sa League of Municipalities of the Philippines – Bukidnon Chapter, gi-hagit ni Director Cariño ang mga mayores sa Bukidnon nga mang-gilabot sa pagplano ug pakig-alayon sa ilang ahensiya alang sa pagtuki sa mga panginahanglanon sa umaabot nga panahon, ug sa pagpatuman sa mga proyekto alang sa pag-tubag niining mga panginahanglanon.

Mihatag usab ang mga mayores og school supplies, hygiene kits, ug gift packs sa 50 ka estudyante sa Apyao National High School isip kabahin sa ilang outreach program.

Nagpasar ang Liga sa resolusyon ngadto kang Governor Zubiri para mahugtan ang lakang may kalabutan sa African Swine Fever (ASF), ug usab sa mga membro sa LMP Bukidnon nga magdungan sa pag-taud og tarpaulin nga pahimangno ngadto sa kasundalohan ug NPA nga tahuron ang International Humanitarian Law (IHL) karong Oktubre 24, 2019 isip pagsaulog sa United Nations Day.