Mayo 17, 2021 – LUNGSOD SA QUEZON MAPASALAMATON KANG GOVERNOR ZUBIRI

Mapasalamaton nga gidawat sa lokal nga panggamhanan sa Quezon, Bukidnon sa pagpangulo ni Mayor Pablo “Poling” Lorenzo ang grasya nga gidala ni Governor Jose Ma. R. Zubiri, Jr. nga pondo alang sa mga gitumbok nga proyekto sa lungsod ug barangay ug mga ayudang panginabuhian sa mga mag-uuma dinhi sa lungsod.

Gitunol ni Gov. Zubiri ngadto kang Mayor Lorenzo ang tseke nga nag kantidad sa beynte-singko (25) milyones ka pesos ug ang tag-usa (1) ka milyon ka pesos ngadto sa 31 ka mga barangay kapitan niini. Kini nga salapi gamiton alang sa mga proyekto nga magdalag kaayohan og tubag sa nag-unang panginahanglanon sa katawhan.

Gawas niana, gikalipay sa 4,723 ka mga mag-uuma sa mais sa gitunol usab sa gobernador diin matag usa modawat sa usa ka bag nga hybrid corn seeds (herbicide ready) og 2 ka bag nga complete fertilizer. Sa kinatibuk-an adunay 4,723 bags nga hybrid corn seeds ug 9,446 ka bag sa abono sa kantidad nga P26,377,955 ang mahatag subay sa Seeds and Fertilizer Distribution Program sa Probinsiya sa Bukidnon.

Ang pagpanghatag sa libre nga binhi og abono usa sa mga programa ni Gov. Zubiri sa paghatag og alebyo sa kapubrihon ilabi na sa atong mga igsoong mag-uuma.