IGSUON, ABRI NA ANG MERKADO NGA ATONG GIPANGHINAMAN!

Malampusong gi-inaugurate ang Quezon Central Market karong adlaw, ug nasayran ang gibati nga kalipay sa mga mamalitay ug mga negosyante sa pag-abri niini.

Sa pipila ka adlaw nga milabay, naghinay-hinay sa pag abri ang mga negosyante sa mga stall kung diin gidisplay ang nagkadaiyang mga produkto nga gikinahanglan sa pangadlaw-adlaw, sama sa isda, karne, prutas, gulay, bugas, ug mga dry goods.

Karon nga na-inaugurate na ang maong merkado, IN FULL SWING NA ang operation dinhi.

Magsumikad ang usa ka mabungahon nga ekonomiya sa Quezon Central Market. Matod ni Mayor “Poling” Lorenzo, ang presko nga palaliton sa kumpleto, barato ug limpyo nga merkado ang usa ka rason sa padayong kalambuan sa lungsod sa Quezon.

Iya usab gipaabot ang iyang mainitong pasalamat kay Senador Christopher Lawrence “Bong” Go, nga maong naghatag sa unang pondo nga P11M alang sa rehabilitation sa merkado, samtang gipun-an usab sa munisipyo sa Quezon ang uban pang galastohon sa pagpatukod sa merkado. Mokabat P17M ang project cost niini.

Sa gipahigayong Inauguration Program, gipadayag ni Sen. Go ang iyang mainiton nga pagtimbaya sa lungsod sa Quezon gumikan niining kalampusan. Matod niya, gipaninguhaan niya nga magserbisyo alang sa tanan nga nanginahanglan.

Gipasalamatan usab ni Mayor Lorenzo si Cong. Manuel “Manoy” Zubiri sa iyang makanunayong suporta ug pagpalangga sa katawhan sa Quezon.

Kahinumdoman nga gisugdan ang pagtrabaho sa maong merkado, human gipaabot sa katawhan sa Quezon sa usa ka pampublikong pakighinabi kaniadtong Hulyo 2019 ang kagustuhan niini sa usa ka merkado nga dako, limpyo, ug kumpleto, kung diin mapalit ang nagkadaiyang klase sa produkto aron dili na sila mamalit sa laing lungsod.

Sa unang adlaw nga nag-operate ang Quezon Central Market, gikalipay usab sa mga mamaligyaay ang nag uros-uros nga halin gumikan sa interes sa mga lumulupyo sa lungsod nga mamalit dinhi.

Sa Quezon, Bukidnon, ang pag-asenso SIGURADO!