PHOTOS:

Congratulations! Malipayon nga gidawat sa mga Senior Citizens sa Quezon, Bukidnon ang mga premyo nga gihatod kanila kaniadtong miaging semana. Kini atol sa tinuig nga Senior Citizens’ Day nga gisaulog kaniadtong Oktubre 1, 2020.

Adunay mga kagamitan sa balay sama sa mga habol, unlan, kaldero, foam, takuri, heater, ug electric fan nga nadaogan sa 142 ka senior, samtang nakadaog usab og cash prize nga mokantidad P500 ang 420 ka mananaog. 

Midaog ang Senior Citizens Associations sa Brgy. Paitan, Poblacion, Magsaysay, Puntian, Minongan, ug C-Handumanan og electric fan, samtang ang Brgy. Salawagan, Sta. Cruz, Mibantang, Cawayan, ug San Isidro Senior Citizens Associations nakadawat usab og water jug.

Nakadawat usab sa cash prizes ang mga mananaog sa talent portion: P1,500 sa 1st place, P1,000 sa 2nd place, P800 sa 3rd place. Aduna pud consolation prize nga P500.

Mihatag si Bukidnon Gov. Jose Ma. R. Zubiri, Jr. og P500,000 isip pagpuno sa 100 ka cash prizes, inubanan sa 1,000 ka bangko nga ipangapod-apod sa mga Senior Citizens’ Associations sa matag barangay. 

Naghatag usab si Senator Migz Zubiri, Cong. Manoy Zubiri, ug Mayor Poling Lorenzo og donasyon nga tig-P50,000, ug si Bukidnon Board Member Ben Baguio og P10,000 isip pagpuno sa cash prizes.

Gihatdan usab og gift packs nga adunay gatas, bugas, vitamins, haplas, kape, asukar, snacks, ug face towel ang mga Seniors. 

Taliwala sa nasinati nga pandemya, gisaulog kining pang-upat nga hugna sa Senior Citizen’s Day sa radyo ug sa Facebook, kung diin nasayran ang mga pasundayag sa mga senior sa kabarangayan, mga pamahayag sa lideres, ug raffle draw.

Gimugna ang Senior Citizens’ Day isip pagpadayag sa pagpalangga ug pasalamat sa mga Seniors sa Quezon, gumikan sa ilang mga kontribusyon sa kalamboan sa lungsod. 

Gideklara usab ang Oktubre 1 isip Senior Citizens’ Day pinaagi sa Municipal Ordinance 2018-10 kaniadtong termino ni Mayor Lorenzo isip Vice Mayor.

Mapasalamaton ang lokal nga panggamahanan sa Quezon, Bukidnon sa mga sponsors: Gov. Jose Ma. R. Zubiri, Jr., Sen. Migz Zubiri, Cong. Manoy Zubiri, Mayor Poling Lorenzo, Board Member Ben Baguio, SB Store, Del Monte Philippines, Inc. Kiokong Construction Development Corporation, ug FPA Construction; ug sa partners: Radio Kilat 107.7 FM, Lowan-lowan Quezon Eagles Club, First Puntian Farmers Association (FIPUFA), ug Aktibong Kabatan-onan sa Quezon (AKQu).