AGOSTO 24, 2021 – Malipayong gidawat sa mga residente sa Sitio Mibislig, Brgy. Sta. Felomina, Quezon, Bukidnon ang serbisyo ug ayuda nga dala sa mga lumilihok sa lokal nga gobyerno sa Quezon, pinangunahan ni Mayor “Poling” Lorenzo.

Kini atol sa unang hugna sa BULIG KAN TA MANOBO (PAGTABANG SA MANOBO) kung diin gidala sa mga nagkadaiyang mga opisina sa gobyerno.

Miadto ang mga personahe sa Municipal Mayor’s Office, Municipal Health Office, Municipal Social Development and Welfare Office, Municipal Civil Registrar, ug Quezon Municipal Police Station, inubanan sa 3rd Infantry Battalion ug sa mga opisyales sa Brgy. Sta. Felomina sa maong sitio.

Gipaagi sa health checkup sa Municipal Health Office (MHO) ang mga residente niining sitio, samtang naghatod ang Municipal Social Development Welfare Office (MSWDO) og hinabang nga bugas ug uban pang mga panginahanglanon.

Gihikay usab sa Municipal Civil Registrar ang ilang mga basic nga mga dokumento sama sa birth ug marriage certificate, samtang gisuta sa Quezon Municipal Police Station ang kahimtang sa kalinaw sa Mibislig.

Gisubay usab sa Municipal Mayor’s Office kung unsa pay mga gikinahanglan nga mga kalamboan para sa katawhan sa Mibislig.

Mapasalamaton kita sa grupong Abstrider sa ilang tabang nga transportasyon para sa atong mga personahe, gamit ang ilang mga trail bike.

Gipahigayon ang BULIG KAN TA MANOBO sa tinguha nga matagaan og pagtagad ang mga tuyuonon nga sitio ug mapaduol ang serbisyo sa gobyerno sa mga residente niini.

Sa maong higayon, gipaabot sa mga lumulupyo sa Mibislig ang ilang dakong pasalamat sa pagtagad nga gihatag sa atong lokal nga panggamhanan.

Ang Sitio Mibislig adunay gilay-on nga molabaw 40 kilometro gikan sa sentrong bahin sa Quezon. Matod sa mga lumulupyo sa Mibislig, mao kini ang unang higayon nga miabot ang gobyerno sa ilang tugkaran, sa taas nga panahon nga namuyo sila dinhi.

Kaniadto, dili pa maagihan sa motorsiklo ang dalan padulong sa Mibislig, apan gipaningkamotan ni Mayor Lorenzo nga masugdan ang paghawan ang maong agihanan. Karon, mahimong mabisitahan na ang Mibislig pinaagi sa motor.

Kini nga programa alayon sa tinguha ni Mayor Lorenzo nga walay mabiyaan sa kalamboan sa lungsod sa Quezon, Bukidnon.