SETYEMBRE 6, 2021 – Mapasalamaton nga gidawat sa mga residente sa Sitio Dumasilag, Brgy. Sta. Felomina, Quezon, Bukidnon ang serbisyo ug ayuda nga gihatod sa lokal nga panggamhanan sa Quezon, pinangunahan ni Mayor “Poling” Lorenzo, atol sa ikaduhang hugna sa BULIG KAN TA MANOBO (PAGTABANG SA MANOBO).

Miadto ang mga personahe sa Municipal Mayor’s Office aron sutaon ang ilang mga gikinahanglan para sa kaayohan sa Sitio Dumasilag. Mipahigayon usab og medical check-up ang Municipal Health Office (MHO) ug gisuta ang ilang mga kahimtang sa kahimsog ug panglawas, samtang gitunol sa Municipal Social Welfare and Development Office (MSWDO) ang hinabang nga bugas ug uban pang panginahanglonon.

Gitabangan usab sa atong Municipal Civil Registrar (MCR) ang mga lumulupyo sa paghikay sa ilang mga importanteng dokumento sama sa birth ug marriage certificate, samtang gisuta sa Municipal Police Station ang kahimtang sa kalinaw sa maong lugar.

Mapasalamaton kita sa 3rd Infantry Battalion sa pagsiguro nga luwas ang atong mga personahe sa pagpahigayon sa maong outreach, ug sa grupong ABSTRIDER sa boluntaryong pagpasakay sa atong mga lumilihok.

Gipahigayon kini nga programa aron tagaan og pagtagad ang mga hilit nga sitio sa lungsod ug mapaduol sa ilaha ang serbisyo sa atong gobyerno.

Mipaabot ang mga lumulupyo sa Sitio Dumasilag sa ilang kalipay sa pagtagad ug serbisyo nga gipaabot bisan sa kalayo sa lugar.

Kini nga programa alayon sa tinguha ni Mayor Lorenzo nga walay mabiyaan sa kalamboan sa lungsod sa Quezon, Bukidnon.