PEBRERO 14, 2020 – Gi-hagit ni Mayor Poling Lorenzo ang mga market vendors nga mag-andam aron masiguro nga mu-lambo ang merkado publiko ug masinati sa katawhan ang nagkadaiyang produkto nga lab-as ug barato. Gi-awhag usab niya ang mga market vendors nga dili lamang mag huna-huna sa kaugalingong ginansiya, kung dili para sa kaayohan sa tanan.

Atol kini sa iyang pakighinabi sa market vendors diin iyang gipaminawan ang mga sugyot sa mga public vendors, ug iyang gisaysay ang iyang mga plano alang sa pagpalambo sa Public Market nga nahimutang sa Brgy. Libertad.

Matod pa niya, angay lamang nga adunay insaktong puhunan ang tanan mamaligya sa maong merkado, apan iyang gikasubo nga gipangwartahan ang pipila ka market vendors sa mga small-time money lenders. Imbis nga gamiton ang halin sa uban pang panginahanglanon o idugang sa ipon, gi-kaon lamang kini sa utang.

Kung adunay insaktong puhunan ang negosyante, dili na kini magsalig sa utang ug mahimong malahutayon ang negosyo niini. Kung mahimong malahutayon na usab ang mga negosyo, mahimong mas bibo na ang market site ug mu-uswag ang kinatibuk-an.

Gipadayag usab ni Mayor Lorenzo nga andam ang lokal nga panggamhanan sa Quezon, Bukidnon nga suportahan ang mga mahimong magbaligya sa Public Market human sa pag-rehabilitate niini, pinaagi sa seminar, pag-tabang sa pag-siguro sa supply, ug uban pa. Matod pa niya, angay lamang nga tabangan sa gobyerno nga ipa-barog ang mga negosyante, kay sila ang makapabuhi sa ekonomiya sa Quezon, Bukidnon.

Kung ma-siguro ang insakto nga supply, mas daghan mapilian ang mga mamalitay nga presko, barato, ug de kalidad nga mga produkto sama sa otan, prutas, ug nagkadaiyang karne.

Kahinumdoman nga sa sinugdanan sa administrasyon ni Mayor Lorenzo, iyang gi-hinabi ang market vendors ug mga mamalitay, ug gi-awhag nila ang ka-bililhon sa usa ka dako ug kumpleto nga merkado kung diin masinati ang limpyo, klase-klase, ug barato nga produkto.

Lauman sa tanan nga sugdan na karong tuig ang pag-rehabilitate sa Public Market sa Brgy. Libertad pinaagi sa pondo nga P10M gikan sa opisina ni Senator Christopher “Bong” Go.