ABRIL 2, 2020 – Sa iyang pakig-hinabi sa Sangguniang Bayan sa Quezon, Bukidnon, gipadayag ni Mayor “Poling” Lorenzo nga dapat subay sa insaktong tumong ang tanan mga lakang batok sa krisis sa CoVid-19 subay sa gipakanaog nga General Community Quarantine, dili lamang pakitang-tao. Pinaagi niini, ma-siguro nga epektibo ang maong mga lakang sa pag-panalipod sa katawhan.

Kini atol sa gipahigayon nga briefing inubanan ni Vice Mayor Joseph Durotan, inubanan sa mga konsehales sa lungsod sa Quezon, Bukidnon. Sa maong panag-tapok, gi-hisgotan ni Mayor Lorenzo ang mga lakang sa paglikay sa maong sakit.

Iyang gipadayag ang ka-bililhon sa pag-quarantine ug pagbaton sa social distancing. Matod pa niya, ang tumong niini ang pag-siguro nga dili magkahimamat o magtapok ang daghang tawo, aron nga wala’y higayon nga mokatag ang virus.

Gi-dugang ni Mayor Lorenzo nga angay lamang ipahugot sa barangay councils ang quarantine, aron masiguro nga dili mataptan ang mga tawo, ilabi na ang katigulangan ug mga adunay balatian, nga maoy posible madutlan sa sakit, sumala sa kasinatian sa ubang nasod.

Matod usab ni Mayor Lorenzo, gi-tahasan ang barangay council sa pag-bantay ug atiman sa mga Persons Under Monitoring ug Persons Under Investigation, paghimo sa mga isolation room, pagpang apod-apod sa ayuda, ug pagpasabot sa mga tawo bahin sa mga palisiya nga gipakanaog batok sa CoVid-19.

Nahisgotan usab sa maong panagtapok ang ayuda nga ipanghatag sa mga tawo nga nasayran nga pinaka-nanginahanglan. Kahinumdoman nga gipadayag ni Mayor Lorenzo nga adunay supply sa pagkaon nga gikan sa Probinsiya sa Bukidnon nga gi-andam para sa matod pa poorest of the poor, sumala sa pag-profile sa Provincial Social Welfare Development Office.

Aduna usab gi-andam nga supply ang munisipyo sa Quezon, Bukidnon aron ma-siguro nga ayudahan ang mga pamilya nga nanginahanglan og hinabang gikan kay Gov. Jose Maria Zubiri Jr. karong panahon sa krisis.

Sa hinapos, iyang gi-aghat ang konseho nga suportahan ang inisyatibo sa gobyerno batok sa CoVid-19, pinaagi sa quarantine, social distancing ug pagbaton sa saktong hygiene. Matod pa ni Mayor Lorenzo, kung maghiusa ang tanan, mahimong maluwas ang katawhan sa bahad sa virus.