OKTOBRE 14, 2021 – MGA PROGRAMA SA MAAYONG PANGLAWAS SA QUEZON, GIDAYEG SA DOH!

Gidayeg ni Department of Health (DOH) – Region X Director Dr. Jose R. Llacuna Jr. ang maabtikong pagpatuman sa mga programa sa lungsod sa Quezon, sa tinguha nga masiguro ang maayong panglawas sa mga katawhan.

Sumala kay Dr. Llacuna, mas mapadali nalang ang pagkab-ot sa maayong panglawas sa lungsod tungod sa mga proyekto sama sa pagtukod sa Quezon Health Center Infirmary nga giila sab isip Quezon Community Hospital.

Gisuta ni Dr. Llacuna, inubanan ni Mayor Poling Lorenzo ug mga personahe sa DOH ug lokal nga panggamhanan sa Quezon ang Municipal Gymnasium nga gihimong Vaccination Site sa lungsod, ang nahisgotan nga Quezon Health Center Infirmary o Community Hospital, ug ang hapit na pud mahuman nga Evacuation Center.

Kini nga mga proyekto gipatuman sulod sa administrasyon ni Mayor Lorenzo aron matagamtam sa katawhan sa Quezon ang kahimsog, nga adunay dakong bili sa kalamboan sa usa ka pamilya.

Miuban sa pagbisita si Dr. Vincent R. Raguro (DMO V) nga nangulo sa Provincial District Health Office (DHO).