HUNYO 16, 2020 – Mi-duaw si Bukidnon 3rd District Representative Manuel “Manoy” Zubiri sa Munisipyo sa Quezon, Bukidnon, isip pagsaulog sa adlawng natawhan sa amahan sa lungsod Mayor “Poling” Lorenzo.

Sa maong pagbisita, gi-hinabi ni Congressman Manoy si Mayor Lorenzo ug ang mga miyembro sa Sangguniang Bayan: Vice Mayor Joseph Durotan, ug Councilors Jomic Fortich, Rey Baguio, ug Jerly Areja. Nahisgotan sa maong panagtigum ang iyang mga plano isip pagtabang sa katawhan karon nga naa pa ang bahad sa COVID-19.

Matod pa ni Cong. Zubiri, mapasalamaton siya nga bisan pa man na-apektohan ang panginabuhi sa mga Pilipino, wala ra kayo na-dani ang Bukidnon gumikan kay kini ang usa sa pinakadakong food producers ilabi na sa Mindanao. Tungod kay nagsumikad ang ekonomiya niini sa agrikultura, mi-lahutay ang katawhan sa Bukidnon; apan angay giyapon nga suportahan sa gobyerno ang pribado nga sector aron masiguro nga magpadayon ang pag-asenso sa matag-pamilya.