OKTUBRE 07, 2019 – Gi-balita ni Mayor “Poling” Lorenzo ang tanan mga kaayuhan nga na-tuman sulod sa una nga 100 ka adlaw sa iyang administrasyon.

Matod pa niya, usa sa pinaka-dako nga accomplishments sa administrasyon ang pagpahan-ay sa mga pamaagi sa pagdumala alang sa mas paspas ug epektibo nga serbisyo. Usa niini ang pagmugna sa Mayor’s Action Center, kung diin maka-dawat ang nanginahanglan og assistance sa dali nga panahon.

Gi-mugna usab sa lokal nga panggamhanan ang dugang mga opisina, sama sa Municipal Enterprises Management Office (MEMO), Municipal Public Safety Department, ug Municipal Environment and Natural Resources Office (MENRO).

Gi-dayeg usab ni Mayor Lorenzo ang Municipal Health Office nga gipangunahan ni Dra. Lea Catalan mahitungod sa pag-pugong sa epidemya sa dengue sa lungsod sa Quezon. Kahinumdoman nga nagdeklara og State of Calamity ang pipila ka probinsiya sa tibuok nasod gumikan sa pag-kuyanap sa kaso sa dengue. Sa lungsod sa Quezon, nag-anam og pagkunhod ang mga kaso sa dengue sugod sa bulan sa Hulyo hangtod sa Setyembre.

Kaniadto usab Setyembre 30, gi-mugna sa LGU sa Quezon, Bukidnon, inubanan sa Southern Philippines Medical Center (SPMC) ang usa ka Memorandum of Agreement alang sa pag-butang og P1M nga pondo sa medical assistance sa mga indigent nga pasyente.

Gi-hatagan usab ang LGU-Quezon og 90% nga score sa DILG Road Clearing Validation Team, gumikan sa pagpatuman sa gi-mando nga pagbawi sa nasyonal nga kadalanan ug municipal streets.

Apil usab sa mga katumanan sa administrasyong Lorenzo ang pagpalipay sa mga katigulangan pinaagi sa ika-tulo nga Senior Citizen’s Day, kung diin lapas sa 4,000 ka tawo ang ni-tambong. Kahinumdoman nga gipangunahan kini nga inisyatibo ni Mayor Lorenzo kaniadtong termino niya isip Vice Mayor.

Pipila lamang kini sa mga accomplishments nga gipa-dayag ni Mayor Lorenzo.

Gi-awhag usab ni Vice Mayor Joseph Durotan nga naga-suporta ang tibuok 14th Sangguniang Bayan sa tanan mga tinguha ni Mayor Lorenzo.