NOBYEMBRE 12, 2019 – “KAYA NATO,” matod pa ni Mayor “Poling” Lorenzo atol sa mga kalampusan sa administrasyon sulod lamang sa bulan Oktubre.

Nakab-ot sa lokal nga panggamhanan sa Quezon ang Seal Of Good Local Governance (SGLG). Kini nga kadaogan nagpasabot nga ang Local Government Unit sa Quezon nakahimo sa ilang responsibilidad ug nakatuman sa sukdanan sa Department of the Interior and Local Government (DILG).

Ang pito ka mga sukdanan sa SGLG mao ang Financial Administration, Disaster Preparedness, Social Protection, Peace and Order, Business Friendliness and Competitiveness, Environmental Management ug Tourism, Culture and the Arts.

Gipadayag pud ni Mayor Lorenzo ang dakong kalambigitan ni kaniadtong Mayor Gregorio Lloren Gue kay apil sa iyang administrasyon ang gi-review kaniadtong September 2019.

Matod pa ni Mayor Lorenzo, ipakita sa iyang administrasyon sa tibuok nasod nga dili lamang sa usa ka higayon mag-malampuson ang LGU Quezon sa pag-angkon sa SGLG, ug ipakita usab niini ang ekselente nga serbisyo ug pagdumala.

Gi-saysay usab ni Mayor Lorenzo nga gawas sa SGLG, gidawat usab sa Quezon, Bukidnon ang pasidungog nga Seal Of Child-Friendly Local Governance.

Usa pa sa dakong kalampusan sa administrasyon ang pag-rekober sa budget nga mo-kabat 92M para sa pagpa-ayo sa Manuto Bridge nga gikan sa National Disaster. Matod pa niya, mo-padayon na gyud ang repair sa maong tulay, nga dugay nang gipangandoy sa katawhan sa Brgy. Manuto.

Kahibaloan nga sobra 100 surrenderees na ang nibalik sa sabakan sa gobyerno sa pagpatuman sa EO 70 (ELCAC), ug nitabang na sila sa pag-kumbinse sa uban nga nagpabilin nga itahan ang ilang kaugalingon. Dakong hinungdan sa pag-surrender ang kagutom sa mga lumilihok sa New People’s Army (NPA), ug ang pag pagka-daot sa kulturang Lumad gumikan sa hiwi nga ideolohiya.

Nagpasalamat pud si Mayor Lorenzo sa malampuson ug malinawon nga pagsaulog sa mga aktibidades sa fiesta sa Quezon, ug sa mi-labay nga Undas. Han-ay ug plastar kadalanan ug ang sulod sa mga menteryohan.

Matod pa ni Mayor Lorenzo, nahimo kini sa pakig-lambigit sa Public Safety Department, inubanan sa kapulisan, kasundalohan, ug Rural Health Unit.

Isip hinapos sa iyang panaghisgot, gi-awhag ni Mayor Lorenzo nga angay lauman sa katawhan nga mas daghan pang mga proyekto sa umaabot 2020.