HULYO 22, 2020 – “Ang mga bata maoy insurance sa future. No matter what, pangitaa’g pamaagi nga mapadayon ang pagtuon sa mga bata, tungod anaa kanila ang kaugmaon sa lungsod,” tipik sa pamahayag ni Mayor Poling Lorenzo atol sa gipahigayong Municipal Development Council (MDC) emergency meeting sa Barangay Salawagan.

Gipaninguha sa lokal nga panggamhanan sa Quezon, Bukidnon ang malampusong pag mugna ug printed materials nga nalambigit sa modular nga pamaagi sa pagpanudlo, aron mapadayun sa mga kabataan ang ilahang pagtuon taliwala sa padayung bahad sa COVID-19 pandemic.

Tipik usab sa maong panagtigom ang planong proyekto sa Sangguniang Kabataan (SK) sa pagpalit ug 22 ka mga computers para sa ipahigayong mobile classes.

Nahisgotan usab ang pag kuha sa mga Locally Stranded Individuals (LSIs) ug Returning Overseas Filipinos (ROFs). Arun ma minusan ang gasto sa local nga gobyerno sa pagkuha sa mga LSI’s/ROF’s, giplanohan ang pagpalit og dugang sakyanan aron gamiton sa pagkuha didto sa pier/airport pauli sa Quezon.

Ga abisuhan usab ni Mayor Lorenzo ang katawhan sa paglikay usa ug byahe sa Valencia City kung dili kini importante o emerhensya tungod delikado pa kini sa pagkakaron.

Ang maong mga lakang giaprubahan sa mga miyembro sa MDC isip pag suporta sa kalambuan para sa katawhan sa lungsod sa Quezon, Bukidnon.