Octobre 23, 2020 – Mapasalamaton si Mayor “Poling” Lorenzo kay nikunhod na ang lebel sa malnutrition dinhi sa atong lungsod ug nakita na ang resulta sa gitinguha ug gihimo nga programa sa local nga panggamhanan sa Quezon.

Atol kini sa gipahigayong Municipal Nutrition Committee Awarding Ceremony diin gipasidunggan ang tanan nidaog sa Nutrition Program nga gi-implementar ngadto sa mga kabarangayan. 

Matod ni mayor, sa pag-ubos sa lebel sa malnutrition, himoon na sab nga mutaas ang lebel sa nutrition pina-agi sa programang Garden of Go, Grow and Glow (G4) og pagdugang nutrition dili lang sa kabataan apan para sa tanan ug hagit sab kini sa mga kapetanes ug nutrition scholars nga mahatod kini sa kabalayan. 

Subay niini ang pagahimoon nga municipal garden para mag-produce og mga seeds nga daghan og protina para ihatag ngadto sa mga kabalayan. Kinahanglan sab tudluan ang mga ginikanan alang sa insaktong pagpreparar sa mga pagkaon nga sustansyado.

Tungod kini sa tinguha nga matagaan sa saktong nutrition ilabi sa mga kabataan para mahimo sila nga Bigger, Taller, Stronger, Healthier, ug Smarter sa ilang pagdako ug makabaton og competitive advantage.

Gihisgutan sab ni Councilor Rey Baguio ang pagahimuong gardening project sa Linabo, Quezon, Bukidnon aron naay makuhaan sa presko ug barato nga produkto sa utanon nga makuha lang dinhi sa atong lungsod.