SETYEMBRE 26, 2019 – Matod pa sa ka-pulisan sa Quezon, Bukidnon, dako na kaayo ang pagkunhod sa mga insidente sa trapiko, sukad sa hugot nga pagpatuman sa balaodnon sa trapiko, ilabi na sa pag-maneho sa mga menor de edad.

Usa kini sa na-hisgotan sa Municipal Peace and Order Council (MPOC) Quarterly Meeting nga gipahigayon sa Conference Hall sa munisipyo.
Gi-hagit usab ni Mayor “Poling” Lorenzo ang BUKTRAMCO nga tubagon ang kakulangon sa pampublikong sakyanan nga ga-biyahe, ilabi na sa panahon sa rush hour.

Mao kini ang hinungdan sa overloading, kung diin gaka-butang sa peligro ang kinabuhi sa mga bata nga sumasakay panahon sa buntag pagpadulong sa skwelahan, ug sa pagpauli.

Gipadayag sa 88th Infantry Battalion ang ilang kalampusan sa pagsumpo sa kalihokan sa komunista.

Pagmatuod niini, ubay-ubay na nga mga ka-alyado ug sakop sa komunistang grupo ang mi-tahan sa ilang kaugalingon sa gobyerno.

Gi-dugang ni Mayor Lorenzo, labaw sa tanan, sa tibuok Asia, ang Pilipinas lamang ang nakasinati ug dugay nga problema sa insurgency, nga usa ka babag sa kalamboan sa usa ka munisipyo, siyudad, o nasod.