“Kinahanglan pangandaman ug planuhon ang umaabot.”

Mao kini ang gipadayag ni Mayor “Poling” Lorenzo atubangan sa mga barangay officials ug personahe sa DSWD-KALAHI-CIDSS sa gipahigayong Municipal Talakayan.

Iya usab gipadayag ang pakig-alayon sa nagkadaiyang ahensya sa gobyerno alang sa han-ay nga pagtuman sa mga proyekto, susama nalang sa pagrecover sa mobalor P92M para mapatukod ang tulay sa Brgy. Manuto. Napondohan na kini kaniadtong 2017 pinaagi sa DPWH, apan wala mapatuman gumikan sa wala mabutyag nga rason.

Kahinumdoman nga adunay pipila ka proyekto nga natagamtaman sa nagkalain-lain nga barangay sa Quezon, Bukidnon pinaagi sa KALAHI-CIDSS. Gumikan niini, nanawagan si Mayor Lorenzo nga siguruhon nga haom ang mga plano sa makanunayon nga pag-uswag sa lungsod.

Iyang gi-hisgotan ang pagpatukod sa insaktong road network, maayong edukasyon, pagsiguro sa kahimsog pinaagi sa libreng panambal, insaktong nutrisyon, ug pag-protektar sa watersheds sa mga kalihokan nga magdala sa maayong ugma sa Quezon.

Sa hisgotanang peace and order, matod pa niya, kinahanglan mapanalipdan ang katawhan batok sa pagpanghulga haron nga luwas manginabuhi ug daghan negosyante ang motukod sa negosyo.

Angay usab hinumdoman ang kalipay sa katawhan, busa gimugna ang nagkalain-lain nga mga aktibidades sama sa Kiokong Octoberfest ug uban pang palingaw sa administrasyong Lorenzo.

Kining tanan dayag nga timaan sa tumong nga dunay klarong padulngan ang administrasyong Lorenzo.