ABRIL 28, 2020 – Nagmalampuson ang pag-rescue ug pag-amuma sa usa ka Philippine Grass Owl, hinungdan nga kini gi-buhian na nga anaa sa maayong kondisyon sa Kiantig, Brgy. San Jose, Quezon, Bukidnon.

Gi-rescue sa Department of Environment and Natural Resources (DENR) ang maong langgam og gihatod kini sa lungsod sa Quezon kaniadtong Abril 20 aron nga buhian kini sa kalasangan sa Kiantig, kung diin kanunay masayran ang usa ka natural ecosystem nga gipuy-an sa nagkadaiyang mga species sa mga hayop, kahoy, ug tanom.

Nag-alayon ang DENR ug lokal nga gobyerno sa Quezon, Bukidnon aron masiguro ang maayo nga kondisyon niining Grass Owl sa dili pa kini buhian. Sulod sa isa ka semana, gi-atiman ug gipanambalan kini ni Dra. Gemma Siton sa Municipal Agriculture Office (MAO), inubanan sa iyang anak nga si Vincent nga usa ka Veterinary Medicine student sa Central Mindanao University (CMU). Sa pagpanambal sa maong langgam, anam-anam nga nibalik ang kahimsog sa panglawas niini, hangtod sa gi-deklara ni Dr. Siton nga pwede na kini buhian.

Padayon nga makig-alayon ang lokal nga gobyerno sa Quezon, Bukidnon sulod sa pagdumala ni Mayor “Poling” Lorenzo sa mga ahensiya sama sa DENR sa pag-protektar sa mga natural resources, ilabi na sa mga kalasangan og ang maong owl, inubanan sa uban pang klase sa langgam, nga adunay dakong kalambigitan sa pag mintinar sa atong kalasangan og sa balanse sa atong ecosystem.

Sa iyang mga pamahayag sa nilabay nga mga Monthly Convocation, gipadayag ni Mayor Lorenzo ang kabililhon sa mga lasang sa katawhan. Matod pa niya, kinahanglan nga protektahan ang watersheds kay magsumikad diri ang mga panginahanglanon sa mga tawo sama sa panubig ug pagkaon.